影帝黃秋生萬里尋親，原本係獨生子，突然相認咗一對現居澳洲、74歲同父異母孖生兄長，兩位哥哥日前由澳洲來港團聚，更探訪秋生媽咪，令秋生好感動。

短短幾天相處，令秋生人生觀改變，佢坦言放下一些包袱，掃走抑鬱，人都開朗咗，佢形容呢刻係一個「新嘅黃秋生」，對於網民都戥佢高興，秋生今日短訊回覆《蘋果》話：「太好了，希望為別人帶來正能量。」

對於孖生哥哥相認，秋生今日接受電話訪問時話：「難得佢咁唔介意，佢哋好好。」親情可貴，孖兄更建議秋生申請回英國護照，秋生表示會嘗試辦理，畢竟手續繁複，佢話：「我周圍工作有需要，反而一對囝囝睿銘、煜政，一個美國出生，一個加拿大出生，佢哋唔使。」

當日首先跟秋生聯絡嘅姪仔，即大孖David兒子，原來只細秋生兩歲，秋生話：「孖兄返咗澳洲，我哋keep住有電郵，姪仔細我兩歲咋，我同佢傾得埋，David個孫就同我囝囝都已交換Skype。我兩位哥哥冇玩facebook，我哋老鬼電郵啦。」秋生樂見下一代已緊密聯絡。

精選娛聞，喺晒《娛果》
http://fb.com/appledailyent