永恆亞視今年1月29日借OTT平台復活，點知開台唔夠100日，已經爆出高層大地震，擔任CEO嘅吳雨，同任職營運總監嘅區偉林齊齊轉做顧問，嗰陣有傳亞視老闆拒再揼水。

上月有亞視員工向《蘋果》爆料，無綫舊人和亞視舊人雙方合作上出現問題，影響士氣，跟住仲話搵外行人新管理層執拾爛攤子，身為CEO的吳雨死撐：「我不嬲係顧問。」（新聞連結： https://bit.ly/2LReQpL　）

今日有聲稱係「憤怒的一群」嘅讀者再本報向爆料，指亞視噚日再向員工落刀、解僱各部門合共近百名員工，裁員行動對節目亦有影響。

本報收到消息，指今次裁員行動，首當其衝受影響的是《今晚見》。本來該節目播到7月中，最初亞視高層有意搵原班人馬做新節目，但係0依家要hold住成個計劃。有份主持《今晚見》嘅朱慧敏，今日接受《蘋果》訪問，佢話：「我冇聽聞過呢件事喎，我同佢哋係以project形式合作，係做《今》嘅主持，我到o依家都未收到通知話做到幾時，亦未收到話會轉形式。」

朱慧敏仲話：「我覺得ATV apps已經run咗半年嘅時間，如果真係有啲創新嘅諗法，又好合理同正常。」之不過裁減咗嘅員工，又有冇啲係《今》嘅幕後同事？佢就話：「我係逢星期三返去主持節目，呢件事係噚日先發生，所以我唔係太清楚。」至於有冇擔心裁員問題，佢話：「咁又冇喎，凡事都要向好嗰邊諗，事實上到0依家佢哋都好準時出糧，冇拖欠過人工。」

有份主持《今晚見》嘅樂瞳就回覆本報稱：「我唔係全職員工，我唔擔心呀，自己都有其他計劃想做，所以我0依家同亞視嘅合作關係好有彈性。」有傳原來《今晚見》後會開新節目，但現在有機會泡湯，佢話：「其實我一直都有糧出，咁每個星期都仲有做緊兩晚《今晚見》，我都期待之後節目可以有啲創新嘅方向。」

精選娛聞，喺晒《娛果》
http://fb.com/appledailyent