洛陽鉬業（3993）上個星期四掛牌上市，股價雖然有上有落，但首日收市報10.54元，比招股價6.8元，仍升55%；禮拜五都收11.9元，搞到敏妮心郁郁，嗱嗱臨攞多一次洛鉬本招股書再睇多一次。

敏妮之前都提醒過大家，喺洛鉬招股書裏面提到，中國會喺不久嘅將來對鉬實施出口配額制度，呢樣嘢對洛鉬有乜直接影響，暫時好難估計，但鉬價對洛鉬股價有直接影響，呢個就唔使多解釋。
中國嘅鉬儲量同產量，分別佔全球38.4%同埋19.6%，係全球No.1同埋No.3，如果中國實施出口配額，全球嘅鉬供應量可能會減少，鉬價自然會升。翻睇歷史，04年之前，鉬價一直喺每磅4.5美元橫行；到05年初，突然間升到上40美元。
一年升近10倍，原因係中國執咗葫蘆島同青田礦兩個細規模嘅產鉬礦山，所以中國對鉬嘅出口政策，對全球鉬價影響都咪話唔大。
如果全球鉬供應短缺，洛鉬股價自然就水漲船高。不過，洛鉬更強嘅地方係，佢越嚟越唔依賴出口，04年，洛鉬出口同內銷，佔營業額比例係56.8%同43.2%；05年係51%同49%；去到舊年，內銷佔營額已經增加到65.1%。

雖然，睇番銷售金額，中國嘅鉬出口銷售額增長由05年升76%，到舊年只升13%，係就係縮咗，但內銷就一直保持住1.2倍嘅增長速度。
表面證據支持敏妮買洛鉬，但一人計短，二人計長，穩陣啲再同股王A傾傾，「如無意外，洛鉬應該係全球最大市值嘅鉬業股，會吸引唔少基金吸納，因為有ETF，趁佢回一回時，買番啲長揸都好噃。」
股王A：「我睇呢隻股波動會好大。」
「換個角度睇，咪即係畀機會散戶上車囉。」
股王A：「敏妮，我其實唔係咁鍾意炒資源股，你買股票一向係中長線，資源股未必啱你。」
敏妮完全明白股王A嘅憂慮，投資任何股份，要留意嘅都唔止係間公司本身，仲要睇其他嘢，好似買資源股要留意資源價格表現，金屬市場係全球性嘅，問題就喺呢度，金屬期貨市場24小時運作，如果香港收咗市之後，美國出個壞消息，到第二朝開市時，資源股隨時裂口低開。

之但係，鉬價比較特別，佢冇喺交易所交易，主要靠行內報價，冇咁敏感。不過，炒資源股都係咪長揸，大家有定坐過山車嘅心理準備，先至好炒洛鉬。
http://manlitalk.com/blogs/