現年36歲嘅韓流天王Rain上月喺香港舉行粉絲見面會，噚晚移師到台灣開騷。不過根據台灣傳媒報道，Rain今次第6次喺台灣開騷嘅票房就好慘淡，可見人氣同票房都明顯比以前遜色。噚晚Rain見面會門票僅賣出1,800張，比起以前閒閒地賣出過萬張門票差咗好多，好明顯人氣下滑不少，唔知關唔關佢做咗人夫及升呢做爸爸關係，搞到唔少粉絲脫粉。

台媒指Rain 2005年首度喺台灣開騷，成為第一個登上台北小巨蛋開騷嘅歌手，連唱兩日吸引兩萬名粉絲捧場，兩年後移師桃園縣立體育場演出，吸引1.6萬人。2010年登上高雄世運主場館開騷，雖然場館可容納4萬人，但當年只賣出6成半門票，隔年Rain喺南港展覽館演出，門票賣出7千張，兩年前喺台大體育館辦跨年騷，只得2,500名鐵粉捧場，到噚晚台騷更跌至1,800人捧場。

而噚晚有幸運粉絲被抽中上台，Rain認得粉絲喺上月香港場同樣被抽中上台，得知粉絲飛到台灣支持自己，Rain再問佢曼谷場會唔會支持時，粉絲即刻話會，Rain就承諾粉絲如果曼谷場同樣被抽上台嘅話就會錫粉絲，不過Rain最終縮沙話只會錫手背。

精選韓流，喺晒《娛果》
http://fb.com/appledailyent