翠華（1314）去年底上市至今，股價累升近一倍，噚日市值達60億元，老闆李遠康嘅身家自然水漲船高，佢自己持有嗰批股份都值16.5億元。除咗紙上富貴，李老闆嘅人工亦三級跳喎。

人工勁加88%

翠華最新年報顯示，當翠華喺2012年3月底仲係私人公司嗰陣，李老闆薪金總額85.2萬元。截至今年3月底年度，上市後，不計購股權開支，年薪加退休計劃供款160.5萬元，蘋果同蘋果比加薪88%。
雖然加薪幅度勁，但係相比其他餐飲股老闆，李老闆又唔算好高人工，佢計埋購股權開支，年薪388萬元，對比大家樂（341）CEO羅開光前年人工有834萬元，大快活（052）主席羅開揚人工都有830萬元。
講開又講，翠華計劃下月中喺牛頭角總部，第一次召開股東會，據聞，公司到時會向小股東提供翠華名物，即奶油豬、熱奶茶，唔知李老闆準備幾多畀小股東打包拎走呢？