陳倩揚已為三子女之母，用心鑽研小朋友食材，着重子女飲食習慣，對食物和湊小朋友均盡量親力親為，今個農曆年親手教大家做一個簡易「新手不敗年糕」，材料只需要糯米粉、粘米粉、糖及少少油即可製作，希望幫到初入門新抱又或從未整過年糕的新手，可以氹得奶奶、老公、家人歡心，新年擁有自家味道年糕，倩揚已經炮製了兩打送禮。倩揚認為糕點是新年有象徵意義食品，老公和囝囝都十分喜歡，但覺巿面上年糕偏甜，她喜歡有一種自己的、獨特的味道，糖水方面可以多花心思，例如加入薑汁又或養顏紅棗水，兩子也會親子參與。

倩揚日常除了返工外，有一半時間在廚房度過，一半時間陪小朋友，每日生活都離不開廚房，為了小朋友有均衡飲食，責任重大，直接影響她對飲食興趣，時常在網上平台分享廚藝，將來不排除投資飲食業。倩揚現階段累積粉絲和經驗，今年會推出飲食書：「我唔係超級大廚，只係鍾意鑽研大眾貼地家常菜，所以今年籌備出一本飲食書畀大家參考，可能係好快整到個豐富早餐，顏色靚配搭新鮮，又有營養，小朋友會鍾意食，相信唔係個個媽咪都做到。」

工作方面倩揚放棄大台發展更多姿多采，一直密密接工作，即使現在半職家庭主婦也不乏機會，倩揚說：「改變唔大，只係少咗拍劇，都會拍港台單元劇，網上平台分享工作多咗，又可以喺屋企做嘢，有時小朋友都會問媽咪點解你喺屋企返工，反而收入多咗，仲多咗時間陪小朋友。」今個豬年三位小朋友一家五口留港度歲倍添熱鬧，倩揚笑說：「兩個仔成日都會嗌住媽咪，又爭住講先，我覺得好得意好enjoy呢種被需要感覺，好親密關係，好珍惜小朋友依附住我黃金10年。」兩夫妻有共識，為了家庭拒絕過二人世界，幸福媽媽倩揚說：「老公話等小朋友大咗不斷同我去旅行，彌補番而家時間。」

家庭幸福溫馨，豬年運程方面，倩揚屬豬女，今年太歲年，雖然有犯太歲之說，倩揚一於少理：「聽聞工作上會幾忙，雖然我有小朋友又鍾意整嘢食，但我都好鍾意工作，停落嚟周身唔聚財，要有啲嘢填充留白，唔會白費日子．太歲年我聽聞係驛馬星動，多啲出外工作，一家大細無論工作旅遊機會都好。」

「新手不敗年糕」材料：
糯米粉 300g
粘米粉 50g
片糖/黑糖/增城蔗糖 200-250g，隨個人口味調整
水 400-450ml 不同牌子糯米粉、粘米粉質地會略有分別，要自行調整
油 1湯匙

步驟：
1.將糖與水一併放煲內，待糖煮溶，熄火待涼備用
2.糯米粉與粘米粉過篩
3.先將大半糖水與粉類混合成粉漿
4.再細心留意粉漿稀稠度逐少逐少加入餘下糖水
5.直至粉漿順滑無細粒便可
6.加一湯匙油入粉漿拌勻
7.蒸盤掃油，粉漿過篩一次倒入蒸盤
8.有時間的話先放置一小時再蒸，待粉漿與糖有時間充份結合，口感更佳
9.蒸糕時間約45分鐘至1小時左右（視乎糕盤大小厚薄）

註：如想加薑汁、杏汁、紅棗水等，可在400-450ml這個水份範圍內加成各種口味年糕

10萬蚊 30人分！《動腦Q》新春Q多寶
年三十至初三 3:15pm、10:30pm
豬年動腦，Q多啲money！
http://bit.ly/2QW8LcI

精選娛聞，喺晒《娛果》
http://fb.com/appledailyent