韓劇之前就愛玩姊弟戀配，最近又轉玩父女、叔姪配。

好似近日都幾多人追捧嘅OCN新劇《Black》咁，41歲嘅宋承憲喺劇中就夥拍27歲嘅高雅娜。而近日亦有兩齣新劇公佈咗主角陣容，當中男女主角相差超過18年，猶如玩父女戀一樣。

好似由《太陽的後裔》及《鬼怪》編劇金恩淑寫嘅新作《Mr. Sunshine》，早前已宣佈男主角將由47歲嘅李秉憲夥拍韓片《下女誘罪》嘅27歲金泰璃擔演，而兩人年齡相差20歲，唔少網民都話佢哋好唔襯，難以投入角色。

而近日24歲嘅「國民妹妹」IU亦落實拍攝tvN新劇《我的叔叔》，並會與42歲嘅李善均上演愛情戲，兩人年齡相差18年，雖然比李秉憲配金泰璃年輕兩歲，但始終18年都係一個大距離，所以難免都給人父女戀感覺。

由於接連幾齣韓劇男女主角嘅年紀相距咁大，所以唔少網民都炮轟有鼓吹Lolita嘅風氣，雖然未至於戀童，但始終父女感覺太強烈，唔多適合喺合家歡時段播出。

更多韓流，喺晒《娛果》
http://fb.com/appledailyent