情人節殺到，又係情侶放閃彈嘅最佳時候，立法會一班黃金盛女，佳節眾人一對對之時，唔知會唔會斯人獨憔悴？似乎又唔會！八方問過公民黨陳淑莊（Tanya）、工聯會麥美娟（Alice）同新民黨容海恩，一個隻身飛咗去日本，一個同手足食團年飯，一個夜晚同地區樁腳打邊爐，新時代嘅政界女性，情人節冇愛人相陪，一樣咁精彩。

慣咗單拖去旅行嘅Tanya，今日下午已經喺機場Check-in排隊等上機，呢次係自己一個人飛去日本旅遊，去到當地後，有人會帶佢食好嘢。有新戀情乎？Tanya即時話自己忙過隻狗咁，阿媽喺電視見佢多過見佢真人，所以仲邊有時間談戀愛呢？

講過有生之年都享受唔到產假嘅Alice就話自己情人節忙到癲，上晝返立法會開會，中午約咗個少數族裔家庭食飯，夜晚就同工聯會手足食團年飯。佢似乎好明白，大家點解喺2.14特別關心佢，自言：「大家唔使擔心，我係唔欠缺愛同關心，我係好多人錫。」

至於呢個情人節，點可以唔問下戀情曝光無耐、盛傳同袁彌昌撻著嘅容海恩呢？但恩恩豬話喎，情人節會同三個女人渡過，強調自己全日fully booked。上午先到新界東送花畀街坊，下午就伙拍葉劉淑儀同陳家珮喺囍帖街派花，夜晚就同沙田區議員陳文娟打邊爐，所以冇人可以約到佢喎！只不過咁，佢無提過宵夜時段有乜著落；夜欄人靜時，無理由寂寞......