楊思琦、蘇志威同埋10歲大細囡靖珺今日到荃灣，參與《走出你未來慈善起動禮》，思琦囡囡卓穎啱啱入讀國際學校一年級，而一家人最大挑戰係早睡早起陪穎穎返學，思琦指穎穎都適應校園生活，只係一早6點起身就最辛苦，佢話:「我都有扮早瞓，熄晒全屋嘅燈陪佢瞓，但有時成功有時失敗。」講到資深演員廖麗麗病逝，思琦感到突然同可惜，佢話:「佢社交舞好叻，好記得《舞動奇跡》時佢好鼓勵我，好多謝佢，當時大家有傾有講。」

蘇老闆今次帶埋細囡嚟支持好友，而18歲大囡君蕎原定今年入讀大學，但同老竇相議後，決定暫時放棄讀大學機會，專心學整甜品，蘇老闆話:「佢13歲起每年跟一位師傅，o依家喺一間五星級酒店學緊，出年會去日本再學一、二年深造。」當初大囡有呢個諗法，佢同太太意見係完成好中學階段學業，出來成績都有廿幾分，佢哋再同大囡講最大優勢係冇經濟壓力同冇需要向人交待，專心追求夢想，至於細囡就想做時裝設計師，留待將來再決定。