馬場嘉年華，馬場內有不少埋怨之聲，最高興嘅就係啲細路。首先未舉行嘉年華之前，已有老師教徒登廣告反對，好彩反對無效，佢哋啲學生可以跟家長入場。其次就係部份家長嘈，嘈嘅係事先宣傳比較少，佢哋入到場，因為場地大，遊戲分散，行咗一輪先至識得走去彭福公園，但係人太多，彭福宣布滿座，入唔到去嘅又埋怨一番。
第三種埋怨聲就係標準馬迷，因為閒人、細路太多，在場內穿插，喧嘩聲不絕，自然影響一啲老馬迷專心刨馬，一位資深會員大聲鬧：「馬場變咗遊樂場，點賭馬呀！我要投訴，我要投訴！」第四種埋怨怕會係啲馬場服務人員，做到氣咳，但佢哋當然唔敢出聲，想唔撈咩？大量細路入馬場，會所內遊戲機室打機要先簽卡換tokencoins，居然全部coins換清光，後來者冇得玩，服務員俾人嘈真係難為了家嫂。

話得說回來，雖然馬場內外埋怨之聲不絕，歡笑聲亦好多，散場後大量馬迷留在馬場，陪家人兒童睇煙花，喝采之聲不絕。最覺得錦上添花嘅，當然就係贏馬啲馬主、練馬師啦，唐英年、希斯、告東尼及其他馬主贏咗馬拉頭馬影相之時，全家出動，影番張靚相，以資紀念。既然大家玩得咁過癮，不如明年國慶賽馬，再來一次，玩玩吓，就成為慣例，兒童奉旨入馬場，到時蔡志森等衞道之士就冇晒聲出矣。
左丁山屬於標準馬迷，覺得咁多細路在會員廂座穿插，甚覺滋擾，不能專心落注。不過咯喎，破天荒第一次，最多一年一度，睇開啲啦，可以忍受，無謂埋怨或投訴吖。