當年今日

馮仁昭四圍超:周英傑碩士新人秘製甘油條

蘋果日報 2002/02/09 00:00


英皇今年力捧嘅碩士新人、清洪大狀契仔周英傑(Bernard),日前喺銅鑼灣一間家具店拍新歌《敢愛敢還》MV。而女主角就係英皇嘅新女,今年二十歲嘅Yumiko鄭雅文。
Bernard趁未埋位,用張紙寫咗幾條雞腸(英文)畀個保母,原來佢知個保母病咗,於是幫個保母開藥,叫佢去藥房執藥食。

能醫不自醫
有專業藥劑師牌嘅Bernard同馮仁昭講,佢已經十年冇睇過醫生,一來因身體幾好,二來讀過藥劑科,所以成日都識得自己製藥,好似消炎藥、眼藥水,就連便秘用嘅甘油條都識得整。
馮仁昭最想知嘅梗係佢隻Bernard牌甘油條使唔使得,點知Bernard話能醫不自醫,好少用番自製藥,佢話最多都係用自製消炎水嚟搽暗瘡,遇上有病,自己就去藥房執啲西藥食,所以佢誇口話十年冇睇過醫生就係咁解。

陳妙瑛否認醉酒失態
最近有周刊話陳妙瑛同玩具大王蔡志明、黎姿等一齊蒲吧,而陳妙瑛更加飲到不省人事,要人扶離場。但雜誌入面影到個女仔,用頭髮遮住咗個樣,根本就睇唔清楚係邊個。
陳妙瑛同馮仁昭講話相入面嗰個人根本就唔係佢,雖然佢好嬲,但唔想幫本雜誌宣傳,所以費事澄清。但呢幾日有好多朋友打電話畀陳妙瑛,問佢做乜事飲醉酒,佢覺得好影響自己做生意嘅形象,所以噚日專登開記者會澄清件事。
周秀蘭年宵開檔賣素食
周秀蘭噚日喺銅鑼灣維園嘅年宵市場開檔,賣佢嗰間齋舖「寶光素食」嘅糕點,佢話:「呢個攤檔我拎咗約五萬蚊出嚟搞,我希望可以有咁多錢賺咁多錢。」
周秀蘭噚日看檔,有市民嚟檔口幫襯,身為老闆娘嘅佢,梗係熱情招呼。問周秀蘭有冇出雙糧畀啲員工,佢話:「冇出雙糧,但我有分花紅畀啲員工,等佢哋過年都開心啲。」

方力申為新碟學踩單車
方力申嘅新唱片《一周年》噚日啱啱出街,佢話好希望有好成績。而新唱片嘅封套係方力申踩單車嘅相,有「飛魚王子」之稱嘅方力申,原來唔多識踩單車,為咗拍呢輯相,佢即時去學,結果學咗幾粒鐘就學識咗,佢重話:「好好玩,我重學人哋踩花式㖭,唔知幾勁呀!」方力申運動細胞果然強勁,一學就上手。

Mango考車牌肥佬
王秀琳(Mango)前日考車牌肥佬,噚日佢幫新城電台節目錄音時同記者講話覺得好唔抵,佢話最衰前面架貨車突然溜後,搞到佢爭啲撞車。
Mango重話本來考到車牌嘅話,就有車行送架車畀佢,佢之前連車款都揀埋,問Mango係邊間車行?佢又唔肯講,只係話四月會再考牌喎。