台灣男唱作人、有「情歌教父」之稱嘅周傳雄（小剛），曾於10幾年前來港發展，更作歌俾天后陳慧琳（Kelly），又同過Kelly合唱《再見北極雪》，近年多喺大陸發展，已經好耐冇見過佢。不過，近日喺網絡流傳小剛肝癌猝死，台灣《蘋果》今日聯絡過小剛方面，其大陸經理人公司回覆稱：「周傳雄老師身體非常好，謝謝關心。感謝。」

現年49歲嘅小剛，於2011年起受胃病困擾，身高1.78米（約5呎10吋）嘅佢，由176磅暴瘦至108磅，情況令人擔心，後來喺老婆Vivian嘅細心調理下，體重回升至132磅。

據台灣《蘋果》報道，小剛以前喺台灣嘅經理人公司幫手打去大陸問小剛嘅助手，對方否認小剛病逝消息，仲話後日（10月2日）有商演。小剛嘅助理仲透露小剛近年搬去上海，胃病方面有定期覆診，接近痊癒，目前飲食正常，甚至已經可以開始飲酒，力證小剛身體冇問題。

小剛曾來港發展，先後為陳慧琳及李克勤等香港歌手作歌，後來轉戰大陸，擔任過第二屆《超級星光大道》評審等。

精選娛聞，喺晒《娛果》
http://fb.com/appledailyent