一連兩場「香港夏日流行音樂節 向雪懷一生中最愛作品演唱會」今晚喺紅館開鑼，表演嘉賓陣容強盛，包括譚詠麟、鍾鎮濤、草蜢、關淑怡、周慧敏等，鄺美雲同劉美娟有到場欣賞。

演唱會準時八時半開騷，林志美、黎瑞恩、湯寶如、王馨平、胡琳等歌手一齊大合唱《一生中最愛》揭開序幕，向雪懷表示感激今次喺呢個檔期，讓更多人認識佢嘅音樂，佢話﹕「呢個騷籌備咗10個月，好多歌手十年冇見，但一打畀佢哋就應承，我唔可以講係空前，但之後一定唔會發生。」佢透露過去創作逾千首歌，自己像生咗BB後，托付予歌手孕育同裁培。之後大銀幕播出向雪懷昔日同王菲、陳慧嫻等歌手合作片段，周啟生同太極先後獻唱多首rock歌，令現場氣氛升溫。

鄧建明上台表演嘅時候話﹕「想借現場一萬二千位觀眾嘅掌聲向向雪懷致敬，當年係佢搵我入寶麗金錄音室彈結他，所以先有今日Joey Tang。」

而喺大合唱完咗之後，黎瑞恩就行錯位落台，湯寶如一下拖帶番佢落去。