喺減薪裁員潮之下，最多人幫襯嘅部門，肯定係勞工處。不過，一班負責幫市民搵工、追欠薪、搞勞資糾紛嘅勞工處職員，就因為工作量大增，部門又要資源增值，頻呼就快「爆煲」，有幾位同事重因為工作壓力，要接受精神科治療！呢班職員因為同處長商討不果，噚日寫咗封公開信畀七位立法會議員，希望將事件曝光後，有人可以幫吓拖。
不過，同人唔同命，呢邊廂，勞工處職員忙到「甩肺」，但嗰邊廂，有啲政府打字員，工作就清閒到喺辦公室睇報紙、傾電話。一位正義嘅政府打字員睇唔過眼，喺庫務局刊物《資源增值計劃通訊》內，對班懶到出汁嘅同僚大肆抨擊，叫政府索性摺咗打字員𠵱嗰職系。睇嚟，政府嘅資源分配真係好唔平均喎！


E-mail：[email protected]