吳海昕（Sofiee）早前遠赴北海道，拍攝由她與徐天佑及劉俊謙主演的ViuTV穿越劇《二月廿九》，新劇講述2月29日出生的Sofiee，在2017年的2月28日許願時，突然一股神奇力量讓她穿越到3年後的北海道，她周旋於暖男天佑與高傲的劉俊軒之間，發展三角關係，而她更預知死亡。

天佑與Sofiee日前接受訪問，大談於北海道拍攝時的辛苦經歷，本以為到日本可以寓工作於娛樂，卻未如人意，在攝氏零下13度下拍攝，Sofiee凍至面癱，她說：「我同劉謙有一場戲喺雪地上拉扯、做一場有情緒嘅戲，咁啱大風雪，一擘大口啲雪就飛晒入口裏面，口裏面嘅神經線麻痺咗，我哋面癱咗，因為腦入面好多情緒同對白要爆發，但係塊面啲肌肉控制唔到，一cut機就要搵熱水漱口同暖包敷面。我哋仲要連戲，着夏天嘅戲服，裏面要貼30個暖包。因為都拍得好急，我哋3個要憑意志力，唔可以病，好彩最終都順利。」天佑拍攝時也凍僵了雙腳：「我都冇諗過凍成點，有一日喺戶外拍攝，體感嘅溫度係-13度，我仲要瞓喺冰上面，拍拍吓發現隻腳冇咗感覺，要即刻停，入返室內，不停捽，先有痛嘅感覺，好快冇事就再拍過。」

劇中所帶出的訊息是有關於人生的成長，劇中Sofiee天真孩子氣的性格，不懂得如何在社會生存，知道有穿越的能力後，她學會了幸福不是必然的事實，更因預知死亡，明白珍惜的重要。在現實中，Sofiee卻很相信命運，她說：「尤其是入咗行，9成都係命運，1成係努力，命運控制唔到就唔好去諗。」天佑則說：「人生嘅命運係咪整定㗎呢？我就覺得係可以憑自己改變到少少嘅，唔可以話因為整定而乜都唔使做，自己嘅命運係可以有適當嘅改變。」

採訪：羅慧敏
攝影：沈健程
攝錄：廖達燊
化妝、髮型：Henry Tse@BigCstyling（徐天佑）

-----------------------------
第三屆最港電影大獎
按此立即投票
-----------------------------

《果GYM》隨身播 　健身壹App過！

一按即玩