俄羅斯靚女網球手舒拉寶娃前男友、保加利亞嘅狄美托夫，星期日喺伊斯坦堡網球公開賽決賽打到情緒失控，先後扑爛咗三支球拍。狄美托夫最終喺領先一盤之下畀阿根廷嘅舒華斯曼反勝，只能屈居亞軍，23歲嘅舒華斯曼就贏到職業生涯第一項錦標，不過狄美托夫事後亦有為自己嘅行為道歉。

狄美托夫係伊斯坦堡網賽嘅2號種籽，佢喺決賽面對非種籽嘅舒華斯曼原本形勢大好，第一盤以7:6（7:5）贏出之後，第二盤亦曾經領先5:2，但就畀舒華斯曼追到要打決勝局，而且仲畀後者以7:4贏埋，要打第三盤決勝負。到咗第三盤初段，不滿自己表現嘅狄美托夫扑爛咗第一支球拍而受到警告，到佢打爛第二支球拍時被罰分，令佢喺第三盤落後到0:5，而佢第三次扑爛球拍再被罰一局，亦同時令對手以6:0贏埋最後一盤。賽後狄美托話︰「我嘅行為令到家人、團隊同埋球迷失望，我要為此而道歉……一切都係我嘅錯，我可以講嘅就係咁多。」

狄美托夫打爛三支球拍
http://bit.ly/1pWvisi