「嗱呢度睇明星呢真係一清二楚，邊個架車喺度、上車追蹤都好清楚，哈！」站上半島酒店一樓閣樓，77歲高級調酒師鍾金雄（Johnny）像個大頑童般指向大堂茶座，瞇起雙眼喀喀笑道。由1957年入職半島酒至今，大半生奉獻給這位「遠東貴婦」，在他的雙眸中，那些風景最難忘？拉開酒吧大門小酌一杯，聽他娓娓道來那些已逝年代的美好片刻。

戰後40、50年代，Johnny父親在半島擔任「captain」，15歲時父親因急病逝世，「我阿媽帶我入嚟（半島）見餐飲部總管，畀份嘢我仔做下都好喎；我第一日嚟就住宿舍，200人一齊住。」自此一入半島從未離開，他由派報紙雜誌的信差做起，4年後升任為大堂酒吧「細路」，即學徒，「而家無人做細路喇，新人喺調酒學校學識晒先入嚟。」

學徒生涯總是苦，但眼見Johnny以和年紀不符的強壯臂彎，輕鬆拉開笨重的酒吧大門，多年的訓練始乎果效甚豐，「嗰個時代無雪粒機要鑿碎雪，『雄仔！返工去鑿碎雪啦！』鑿半條百五磅碎雪一定落到杯底先得，鑿完又要換雪櫃水，尤其天熱呢鑿到好辛苦。」

來到一碗魚蛋粉也索價數十元的年代，Johnny當年正是由30元月薪做起，「人工嗰時都幾好使架喇，因為油炸鬼呀搭巴士呀報紙呀1毫子做單位。」有感不諳英語不利工作，他和十多位同事每人夾上10元，聘請另一位同事教書，「佢唔使教科書，買份英文報紙教成個月，例如尋日robbery，金舖被劫。」學有所成，亦造就他與巨星名人酒吧邂逅時不至於「雞同鴨講」。

Johnny一雙巧手曾為多少名人調酒，但印象最深刻要數曾主演《亂世佳人》、已故荷李活影帝奇勒基寶點的一杯Screwdriver，「咁我懶醒畀個螺絲批佢，佢笑笑地話係Cocktail not tool！」這一款伏特加溝橙汁製成的雞尾酒，自此在酒吧流行。還有《桂河橋》男主角威廉荷頓、「占士邦」羅渣摩亞等，都曾是大堂酒吧座上客，「嗰時佢地都係一個保鑣都無，飲下威士忌水之類，好好（容易）招呼架。」酒吧漸漸成了他的「地標」，他笑言很多客人經常專誠來找他，因為喜歡他的「baby face」。

除了名人逸事，吧檯之上亦見證了歷史大事，「我收過最多一百蚊美金貼士，美軍喎，平時啲客都無咁犀利，佢任你攞架等陣返越戰返越南，『You take you take﹗』個lobby坐滿晒，叫『白飯魚』呀個個着晒軍服海軍soldier，嘩嚟喇！到喇有戰艦到喇！」到全民皆股魚翅撈飯大時代，巿道暢旺人人豪氣，「個個都食得唔計數！」

後來本港多間大型酒店陸續開業掀起一輪挖角潮，「1980年Regent開張，剩係廚房佬挖咗20個，即係而家InterCon。」跳槽後的前同事承諾新酒店會升職加薪，但卻從未成功打動這位半島酒保，「有個感情喺度，唔能夠話人哋一新酒店開張就跟咗去。」

這份感情，大概他的熟客亦有同感，「有個熟客每年嚟住20日，嘩啲bling呀diamond，住美國比華利山，富婆嚟，總係要搵返我同另一個同事招呼，次次Dry Martini飲2杯，識咗廿幾年，但97後佢都冇嚟喇。」另有熟客移民溫哥華已久，仍堅持每年寄來花旗蔘，「佢畀咗個地址電話但我未去過，正式退休喇先搵佢。」年代轉變，客源亦有所轉變，現時做日本客、國內客多。

目前酒店約900名員工中，三份一半島年資逾10年，Johnny屬年資最深，現時只有他和一名廚師仍住在酒店。「我而家朝頭早返6點收2點，夜晚8點鐘瞓覺日日如常。」未有兒女的他，家中只剩下他一人，但孤身而不寂寞，半島酒店員工他大半認識，走過長廊不斷有人和他打招呼，猶如老闆出巡卻又添上幾分人情暖意。由「雄仔」到Johnny，眼前一身白色西裝熨貼筆直，用髮蠟梳起的髮型依舊一絲不苛，年紀未有為他添上太多痕跡，雙頰飽滿光滑，大半個世紀的繁榮與興衰，一一化為他的故事。

記者：黃翠儀
攝影：朱家駿、陳海威
剪接：梁文瀚、陳兆楷