當年今日
關於我們

【中環去TKO收$900】Uber再爆公關災難 林保怡新廣告推出解救?

蘋果日報 2017/06/15 23:15

林保怡Uber創科局楊偉雄

俾大家睇少少嘢…
記:記者
局長:局長
記者:局長,近日看到你在社交網站就Uber的發言,有不少『嬲嬲』,是否反映政府的意見跟社會脫節?
局長:對於Uber的個案,我的立場已經清楚表達,首要是尊重法治,法治是我們的核心價值。但這並不代表我們的制度是鐵板,創科局在差不多一年半以來都很努力,如有可能都做些拆牆鬆綁的工作。例如,我們延長改建現有工業大廈及修訂工業地段契約的優惠措施,方便它們轉為數據中心。金融科技的監管沙盒及儲值支付工具牌照亦發出了13個牌照,這些都是突破的範疇,我們會繼續努力。
答非所問,就係特區管治班子作風。
呀介紹番,呢位局長,係同投資推廣署唱反調嘅創新及科技局楊偉雄……2015年,投資推廣署曾於網頁刊登文章,指Uber係外商在港經營嘅「成功個案」……結果,投資推廣署凌晨漏夜刪除有關文章。
上月底警方已展開大規模拘捕行動,仲放埋蛇打擊Uber。早前「我見過!我真係見過!」嘅楊偉雄,又喺fb發功話批評Uber以公共經濟為借口「知法犯法」,下刪___字。
但撐Uber的人,還是有。包括「大衛」林保怡。
呢個大衛,又化身Uber司機,載著個陰謀情人鄭子誠。廣告今日推出,製作團隊仲好細心,配中英文字幕。
成個廣告都係圍繞「選擇」,「有選擇就係自由」、「有選擇就係開心」。林保怡話,選擇這回事,有時會靠直覺。選擇重要嗎?「梗係有得選擇好過冇得選擇啦。一定重要。」正如離開大台呢個選擇,原因始於「欲窮千里目,更上一層樓」,「我一路跳一路跳,跳到上頂喇,我希望衝破呢個罩,睇下自己到底仲有幾高呢上高?因為我選擇跳高啲。」
廣告中,林保怡不諱言經常搭Uber,結尾亦直截了當一句:「我係林保怡,我揀Uber。」
「有選擇,先有進步」。
Uber今次呢輯廣告,係以系列形式推出,其他驚喜陸續登場。第一位出嚟撐Uber嘅保怡,話:「總之有選擇好過冇選擇。」而鄭子誠接受《蘋果》訪問時話:「就好像我做電台節目中借歌曲帶給聽眾一些反思一樣,希望在片段閒話家常間,就我們人生中如何選擇,而實質上,又有幾多選擇來聊一番。」佢仲透露,嚟緊仲有幾個訪問,一切都仲安排緊。
順帶一提,日前苗柏襲港,有乘客稱不滿三號波期間,由中環往將軍澳,Uber收取近900元,但起初單據顯示係只收約300蚊。事主更發現,其500幾蚊,係Surge Charge。
事件曝光後,Uber願意退款,退還多收嘅$509.3,又強調個app喺預約服務時只係報價,但實收幾多,落車先知,又指事主應該係用緊舊app。
有花生友話舊app好過新app,但亦發現好多人原來唔識睇單。有網民稱:「的士是坐地起價,但要先有車才知加幾多!Uber是擺明加價,明碼實價,但可以從apps選擇叫不叫!」亦有人喺的士fb群組留言:「只有講句抵死!的士嘅好處,打風最多收多你一百幾十!依家比人劏$900,所以我永遠覺得打風的士收多幾十至100真係唔過份!」
咁Uber係咪都應該諗諗計改善下?
empty