60歲時裝設計師鄧達智（William），去年和同性男友、44歲醫生陳梓欣（Clement）舉行婚宴，今日會於英國倫敦簽紙，成為合法同性伴侶。兩人去年結婚後，依然分開住，簽紙後計劃會買樓一齊住。

兩人已準備了一黑一白結婚禮服，Clement近月還刻意戒食兼操肌，每天操練兩三小時，練出巨型手瓜，屆時他會穿Paul Smith全白禮服，而鄧達智則會著全黑西裝，兩人在當地時間下午2時（香港時間晚上八時），在Chelsea Old Town Hall簽紙，之後在附近的Pub舉行慶祝派對，約有四十多人出席，屆時青姐胡孟青、前廣管局成員孫郁標等都會觀禮。

一對新人早前受訪，William坦言緊張，笑言有婚前恐懼症：「好忐忑，我的職業係多嘢諗，鍾意諗嘢，希望陳醫生明白。我係一就係三，三就係四，從來未覺得自己咁白癡過。」

反而Clement就自言此刻心情平淡：「都決定咗一齊喇，反而依家好期待，最後嘅一次度蜜月。我哋遊山玩水都差唔多一年。」他指其實兩人之前只是plan去旅行，但有朋友提議在英國簽紙，所以臨時決定行禮，再度蜜月，會先去挪威沿海峽灣行山，再去冰島浸溫泉，然後飛往意大利，由北意的酒莊玩到南部陽光海灘。今次旅行及結婚估計約花20萬。

鄧達智曾表示從來沒想過行到結婚簽紙這一步，那簽紙後，會有甚麼改變？「希望再過一啲自然啲嘅生活，唔要有太大壓力。大家年紀都唔細，明白人與人之間唔好『老奉』囉，唔好有咗個名份，就理所當然咁；我亦唔會再關注世俗眼光點睇。我哋識咗兩年，到今日對佢嘅感覺都係好正嘅！係我眼中嘅小鮮肉嚟嘅！」一句「小鮮肉」搞到Clement面都紅晒：「我唔鮮0架喇，四十幾歲0架喇。總之，簽紙之前之後，我都係同一句：『我會永遠陪住你。我愛你。』」

鄧達智是新界屏山鄧氏第二十六代，家族輩份頗高，近年宣佈出櫃，去年7月與拍拖約一年的Clement訂婚，曾備受鄉親壓力，鄧達智亦不惜放棄近億祖業家產，改遺書留予姪兒。同年9月9日兩人正式舉行婚宴，由於香港法律不承認香港境內外登記的同性婚姻或民事結合，所以兩人赴英註冊，簽紙成為合法同性伴侶。