成軍17年嘅台灣女子組合S.H.E面臨解體，繼Ella肥水不留別人田，將工作交由老公賴斯翔負責，Selina和Hebe亦將相繼約滿華研，昨傳出兩女亦不再續約，華研承認三女將各自成立公司，消息令粉絲震驚！

據台灣傳媒引述一名圈中資深經理人分析，認為事件冰封三尺非一日之寒，更爆料指S.H.E早於10年前已想離開華研，曾跟其他公司接觸，原因係華研作風保守，但S.H.E就想有突破求變，雙方理念唔同，出現分歧。

該經理人指：「比較各天王、天后，如周杰倫或蔡依林有跨國合作案，S.H.E出道17年，卻少聽到她們有甚麼特別的合作案。」雖然S.H.E一早已有離心，不過佢哋由華研一手捧紅，公司「養育」之恩成為三女包袱，就算每次續約前都諗過唔再簽，但最後華研總能化解危機，成功說服三女留底。

然而，今次華研終於無力挽，面臨失去年產值四億台幣嘅金蛋S.H.E，消息傳出後，重創公司股價，今日開市股價狂跌至89元（台幣，下同）停板，單日市值蒸發逾五億台幣，甚至連累大股東驊訊電子股價走弱，創近16個月新低！外界認為，短期內華研嘅營運有不小壓力，對此華研回覆台媒：「股價波動是正常的。」

不過，有分析華研並非全盤皆輸，因為S.H.E歌曲版權都屬於公司，三女出走後除咗公開演出，發行及翻唱都要付版權費給華研，圈內人估計就算S.H.E離開了，華研每年仍可靠版稅進帳逾千萬元，而S.H.E以後要唱舊歌，都需要華研授權，所以，就算S.H.E決定唔續約，雙方都會維持友好關係，互惠互利。

對於有傳10年前已有出走諗法，Ella老公賴斯翔表示：「統一由華研回應。」而華研對此暫無回應。另　有傳Selina因為失聲，婉拒擔任大陸綜藝節目《下一站傳奇》導師，損失960萬人仔酬勞。

精選娛聞，喺晒《娛果》
http://fb.com/appledailyent