日本女星新垣結衣憑大熱劇《逃跑雖可恥但有用》登上事業高峰，東洋男士視佢為「國民老婆」，令佢工作量再創新高，日劇、電影、廣告接過不停，當佢夥拍由山下智久、戶田惠梨香嘅人氣劇系列《Code Blue》拍完第三季，富士電視台隨即宣佈添食，開拍電影版明年上映。

結衣BB拍住男星瑛太嘅電影《MIX》下月上映，近期佢又開始為新片落力宣傳，令佢幾乎冇得休息。不過，結衣BB日前就戴上口罩及帽現身澀谷，原來佢騰出空檔於該區一間治療院消除疲勞，佢於店內逗留30分鐘，呢間設於一棟舊樓嘅隱世老店，主要替客人進行針炙、指壓等服務，似乎結衣BB都係舖頭嘅熟客。