韓劇《愛上哪個我》男星池晟拍完電影之後處於休息期間,而今日有消息表示佢有可能出演新劇《戲子》,準備回歸公仔箱。
池晟嘅所屬公司都承認收到相關嘅出演邀請,不過目前仲係討論階段,未確定係咪出演,又話有新消息會第一時候對外公佈。據了解,如果池晟確定演出,將會飾演男主角申石浩。申石浩曾經係韓國擁有最多歌手嘅娛樂公司室長,依家係新人娛樂公司嘅社長,最後成為一名出色嘅經紀人。而對於《戲子》嘅編制問題,業內人士透露目前劇組同SBS商議中,一日未對外表明立場都存在變數,所以所有出演人員都仲係討論中。
另外,憑韓劇《請回答1988》爆紅嘅男星朴寶劍都收到劇集嘅出演邀請,不過都係討論階段。如果兩人都確定出演,好令人期待呢個組合會擦出咩火花。
而朴寶劍、柳俊烈等《請回答1988》嘅演員,今日佢哋就現身《花樣青春─非洲篇》嘅製作發佈會。