韋斯咸響前日輸埋畀熱刺後,響超聯暫得一分包尾,領隊羅達自然成為超高危領隊,最慘係佢重俾迪肯尼奧用粗口問候,好似慌死佢唔夠衰咁,真係一沉百踩囉。
話說當冼佳亞為韋斯咸追成二比二後,羅達隨即換出迪肯尼奧,用卡域克加強防守,傳媒報道當時迪肯尼奧即刻好大聲咁對住羅達講粗口,嚇到羅達呆晒。呢單嘢反映迪肯尼奧好唔妥羅達之餘,有口痕佬甚至估迪肯尼奧密謀羅達職權,重唔乘機踩佢就勢係假。
話時話,想唔想知羅達事後點回應迪肯尼奧?佢話:「迪肯尼奧都係想振奮士氣啫!」嘩,羅達兄你俾人踩到咁都唔還擊,真係唔死都……。
「空中轟炸機」轉型用腳
比亞荷夫響前日基爾禾作客拉素場波有士哥兼踢到識飛咁滯,睇佢下半場「扯晒蝦」兼抽埋筋都無俾教練換走,就知佢響隊波幾重要。佢係咪老馬虛火就唔敢講,但佢似乎明白淨係食老本用頭槌唔實際,所以前日猛咁墮後射波,咁老重可以轉型,抵讚。