當年今日
關於我們

  政府運動健將逐個捉 - 李八方

蘋果日報 2006/12/30 00:00


由衞生署分拆出嚟嘅衞生防護中心,呢輪因為豬農神秘死亡事件而忙到團團轉,不過反應都算合格,曾浩輝醫生噚日嗱嗱聲轆出嚟回應,明知冇料到都要做記者會,費事俾人話冇交代。相反,佢哋嘅「鄰居」食物安全中心反應就一向慢咗啲,政府內部已經提點佢哋要注意吓呢方面嘅工作,革新吓形象。
食安中心嘅領導其實都唔算外行,唔會唔識風險管理,個副主管何玉賢醫生係食物安全專家,衞生署好早已經培養佢,畀佢出去接受健康教育訓練,理應有所得着。
何醫生好注重個人健康,原來佢每年都喺衞生署搞一兩次集體跑步運動,由佢親自帶隊。政府嘅衞生團隊阿頭周一嶽,更加係運動健兒,佢唔戴金勞,只戴有計時功能嘅電子錶,入政府前已經帶領傷殘奧運香港隊,08年香港辦奧運馬術比賽,周一嶽屬下衞生署有份負責馬匹入口檢疫,佢就好熟手,有次內部討論奧運馬術嘅事,有同事滙報話參與國家唔想咁早嚟香港,以免啲馬離鄉太耐唔習慣,又要帶埋馬伕、獸醫成隊人,但係周一嶽一語道破,話唔使聽佢哋講,嗰啲想攞獎嘅就會早啲嚟,果然後來啲強國都查詢可否早啲嚟做準備,熟習吓場地喎。
一直以嚟有唔少公務員都好熱心喺政府入面推動同事做運動,好似前任荃灣警署總警司何展堂,專登租員工會所,放工之後免費教公務員打拳。康文署就有個康樂事務經理,本身係國術總會詠春教頭,推己及人,喺午間時分,租用附近嘅體育館免費教公務員打詠春。