那夜凌晨，我接到了來自急症病房的急call。一位前一天入院的病人突然心臟停頓，需要急救。我二話不說，立即趕去病房，到達的時候，護士們已經圍着病人進行心外壓。心外壓進行了差不多10分鐘，我問了一條問題：「究竟實習醫生在不在？可不可叫他幫手？」那一刻我們才為意，這位實習醫生還未來到。護士們幾經辛苦才找到這位正在當值的實習醫生，原來他正在當值室睡覺休息。

我說：「不緊要，你來到的話，是時候幫手搶救了。來吧，來為這位病人進行心外壓吧。」

想不到這位操着帶口音的廣東話的實習醫生竟然說：「對唔住呀，我未做過心外壓，我幫唔到手呀。」

我說：「乜嘢話！心外壓你都唔識？乜你冇睇任何仁嘅廣告㗎咩！」

呢位實習醫生的確可能未睇過任何仁的廣告，因為佢來自國內。但係我真係第一次聽到有醫生同我講，佢唔識做心外壓。因為喺香港，基本上所有醫生、護士，甚至係救護員都識得做心外壓。佢話畀我聽唔識做心外壓嘅時候，我真係呆咗。

我唯有叫佢幫我打電話畀深切治療部嘅同事，叫佢哋嚟幫手。我相信呢位實習醫生應該識打電話啩！再過多10分鐘，深切治療部同事還未出現。我再問呢位實習醫生，究竟深切治療部同事幾時會嚟㗎。

佢竟然答我，「我頭先打唔通呀，所以佢咪未嚟囉。」

我決定放棄，搶過佢部電話，親自打畀深切治療部嘅同事叫佢哋嚟幫手。只用咗10秒鐘，電話就接通，深切治療部同事亦喺5分鐘內出現咗。只可惜經過45分鐘嘅搶救，病人依然沒有起色，最終搶救不治。至於呢位實習醫生，在那夜凌晨，完美擔任一位旁觀者。

其實幾時先會有人檢討海外醫生註冊考試嘅規矩？呢位來自海外的醫生成功通過咗執業試，但係連最基本嘅心外壓都唔識做，平日嘅表現亦都乏善足陳。容許呢批考到試，但係臨床水準不足嘅醫生喺香港執業，究竟係唔係恰當？

撰文：一個在公營醫院工作的前線醫生

-------------------------
《蘋果動新聞》訂閱新世代，4月開始免費訂閱，現在接受登記！
http://bit.ly/2Ja3IXw
-------------------------
全港打工仔特約：Lun廚動腦Q
加開1:30pm
3月11至22日
星期一至五1:30pm 10:30pm
http://bit.ly/2IZA8Ef