當年今日
關於我們

商界恐中 - 左丁山

蘋果日報 2019/03/12 02:20

l012GG細語左丁山田北俊華為中國法律維權律師逃犯條例孟晚舟商界恐中政府違憲

律師G來電報喜:「左兄,四月中如果冇出埠,不知可否畀面參加犬兒婚宴?」嘩!咁大喜訊,點會唔參加呀,連忙翻查記事簿及iPhone約會時間表,日期正好係星期六冇馬跑,即使係五時恭候,九時入席,仍然可以坐耐啲等開席,如果係星期一至五或星期日,則恕怪缺席咯!一定係禮到人不到。律師G全心栽培一粒仔成為律師,果然心想事成,但公子自港大畢業後,即進入名氣國際級律師行做上市/融資,由第一日返工開始,未試過晚上八、九點可以放工,點拍拖吖。九年前律師G為小YY做證婚人,已講明好想兒子結婚,但苦無良策,卒之等到佢位公子自願毅然離開律師行,轉工往客戶公司做法律顧問,咁就有時間約會女孩子出街拍拖,依家話結婚㖭,律師G怎不高興!新晉大行律師確係搵到錢,但由二十三歲做到三十三歲,十年間不知天日(周末用來睡覺),好似又唔係好值得噃。還在讀書嘅法律學院叻仔叻女,確係要諗清楚work-life balance,尤其是準女律師㖭。

本想趁機抽水,問吓《逃犯條例》,但律師G講喜事無謂令佢掃興。點知中午飯局又有律師W出現,仲唔乘機問道咩,問佢點解商界咁驚《逃犯條例》修訂,律師W話:「九成係恐中心理反射,因大家對中國法律,司法都冇信心,內地法庭多數由黨委書記在背後話事。實際一啲,就係內地經濟犯罪範圍好廣泛,因有太多限制,香港商人幾易中招㗎!田北俊講到明,同大陸打官司會贏嘅咩,確係一針見血,例如孟晚舟可以控告加拿大政府違憲,華為可以在德州控告美國政府違憲,相反,康明凱可唔可以在北京控告中國政府違憲?在中國去邊度搵律師代表呀,維權律師分分鐘坐監㗎!」呢點好多人都明,商界中人更多經驗㖭,但佢地幾乎全是建制派,平時收埋心中唔講,但打到埋身之時,點都要出吓聲啦。呢樣嘢,修例後有何轉變?律師W話:「現在外地要引渡藏身香港逃犯,要(一)當事人所犯之事在境外及香港皆違反法例;(二)有表面證供支持當事人已經犯例,法庭可判當事人受遣返(引渡);(三)之不過,本地法官可考慮及境外某地之懲罰是否過份、嚴苛、或不公義(如死刑),對當事人之涉嫌犯罪有不成比例之判罰,因而不批准引渡;(四)最後還要行政長官答應批准引渡,而有例子知道特首唔批。」商界人士就係害怕內地一聲令下,本港特首就立即批准引渡也。商界反對喎,政府會讓步?律師W話:「商界全是保皇黨,口硬議員到投票時一定棄權!」