每逢股市低迷，就有堆殘價股衝出黎搞私有化，將靚資產袋落自己荷包，呢期最具代表性嘅大刁有利豐同會德豐（020），不過兩間公司對股東都幾大差別。

同樣喺疫情下表決私有化，上個月利豐股東嘈完一輪之後就「爭取」一袋禮物包，包括餅卡、合桃酥、口罩同搓手液。嗰陣一盒口罩現貨價雖然都見頂回落緊，但公價圍返都要過百蚊盒，成Set禮物包「估值」至少都200蚊呀。

今日會德豐就送一個「大信封」，入邊就無最得股東歡心嘅餅卡，得無名品牌口罩一個、消毒濕紙巾一張同口罩暫存夾一個，叫做抵消咗阿公阿婆出一次街嘅抗疫成本，但仲未圍到個車費同食晏錢。

不過，外人又唔需要戥會德豐小股東唔抵，話晒呢幾年會德豐股價走勢好過利豐多多聲。你或者覺得佢Cheap，但佢都可能調返轉佢地用返《精裝追女仔Ⅱ》十三妹果句，「Cheap？Cheap得過你窮？」至少現場小股東們都無乜投訴，相信對於私有化嘅作價都收貨嘅。

李華華