青島港（6198）跟中港大插插，跌穿上年6月上市價，同金手指Value Partners（VP）喺今年4月以嚟最低增持成本價。喺香江行家中，青島港半年增長又最靚仔，有得諗吓。
VP今年4月27號增持青島港H股2,311萬股後，權益曝光，其後兼一路增持，由曝光日應佔青島港7.42%，去到6月尾15.8%，足足一個double，落場最高同最低成本價，每股5.81元同4.65元。青島港現價（3.44元）比5月高位6.07元，插咗43%，質穿上市價3.76元，比VP最低入市成本價，亦講緊潛水26%！
又上月尾，青島港亦多咗位機構投資客Matthews International Capital，佔H股5.01%。睇到集團有基金大孖沙捧場之餘，真係散戶街貨，等值23億元咁大把。都係嗰句，市值奀豬，個市反彈，青島港亦易彈動。
青島港今年上半年盈利10.8億元人仔，增長近27%，新拓港口金融瓣數，係靚仔增長其中一個原因。集團中線食到一帶一路，同航運業大翻身前，青島港開多瓣業務，比行家多條腿走路，無壞。