當年今日
關於我們

新人王李卓庭冇錢養家搞喊家姐

蘋果日報 2008/01/11 00:00


勇奪今屆叱咤頒獎禮樂壇生力軍女歌手金獎的李卓庭,現年24歲,外貌似鄭融,星運則跟當年參加歌唱比賽出線的張學友殊途同歸,同樣在各大小歌唱比賽中屢敗屢戰,結果來自小公司的李卓庭竟撼低獲英皇大靠山撐腰的勁敵鍾舒漫,成功摘金。
李卓庭說:「我成日都話自己係慢半拍恩賜。」她年紀輕輕,但人生故事豐富,源頭只因她對歌唱事業死心不息,她笑說:「我17歲參加最後一屆華星新秀歌唱比賽,又參加第一屆英皇新秀比賽,兩次都係入準決賽,跟住又參加過新星新人類選拔賽,01年又參加過model比賽,就算我返工做OL,都係一直參加比賽,我唔係為入娛樂圈,而係真係鍾意唱歌。」後來她終獲唱片監製方樹樑賞識,引薦她簽約經理人,圓其歌星夢。
李卓庭4歲學跳中國舞,她曾在無綫節目《星光熠熠耀保良》中,做周渝民的伴舞女郎,又曾分別為容祖兒的《一拍兩散》和薛凱琪的《奇洛李維斯回信》唱demo示範歌,問她為何不參加選美作為入行捷徑?她即笑說:「我個心想唱歌咋,我身材又唔好,直情係冇身材,唔會着三點式㗎。」
不過在加入樂壇前,李卓庭基於家庭經濟問題,曾作慎重考慮,她說:「因為阿爸阿媽退晒休,屋企又要供樓,要畀錢屋企,我入咗行仲冇畀錢㖭,我家姐做marketing,佢講到喊,話唔知點算,我都掙扎咗大半年時間,先至決定行呢條路。」
採訪:朱倬誼 攝影:陳慧安
場地:香辣屋@CWB