諸葛紫岐同老公薛嘉麟、何超瓊、何超鳳同幼女何倩珩等，今晚喺灣仔君悅出席香港芭蕾舞團披頭四優先睇慈善晚宴。諸葛紫岐表示剛同老公及囝囝由日本度假返港，此行兩人有努力造人，佢希望追女。

諸葛紫岐話老公身型胖，不愛滑雪，佢話行程中忙於照顧兩父子，未有增磅，薛嘉麟則向老婆搞笑咁話：「冇80歲都唔好畀飽飯佢食。」諸葛紫岐直認日本之旅有努力造人：「努力中，希望今年有好消息。」薛嘉麟聽後即話：「咁要加番飯先。」

問到囝囝喜歡細佬定妹妹？薛嘉麟話囝囝兩樣都鍾意。不過諸葛紫岐卻恨追女，薛嘉麟即冧老婆：「我最鍾意就係媽咪（即諸葛紫岐）。」在場記者提議佢生孖女，諸葛紫岐話：「最好啦，咁我可以收工。」可會考慮人工授孕，諸葛紫岐話：「暫時唔需要。」想親力親為？佢話：「呢個係緣份嚟，感覺會好啲。」諸葛紫岐透露已叫老公放鬆心情，兩公婆有時間會抽空旅行。

精選娛聞，喺晒《娛果》
http://fb.com/appledailyent