有「韓國第一大美人」之稱嘅金喜善，本月11號踏入40歲，但依然保養得宜，一啲都唔似已經4字頭，早前拍完劇集《有品位的她》後，就與樂隊CNBLUE嘅鄭容和、主持人姜虎東拍攝tvN綜藝節目《島劍客》。金喜善日前為雜誌《ELLE》拍攝新相並接受訪問，佢更提到自己嘅童顏秘訣。

金喜善表示自己多做護膚、甚少化妝：「基本上我只係護膚、保濕，錄製《島劍客》時都只係隨身攜帶防曬及保濕用嘅化妝品。亦冇刻意去做運動、減肥，但會keep住做簡單嘅伸展運動，以增強血液循環，我諗對維持身形都係有幫助。而且最近經常認為『想靚住咁老去真係唔係容易嘅事』，如果睇上去太年輕會有啲奇怪，雖然內心好抗拒，但作為女演員，我認為要畀人睇到年紀嘅增長。」

金喜善又提到拍攝《島劍客》嘅事：「拍攝前曾經好擔心，因為冇髮型造型、唔化妝要素顏、又冇經理人喺身邊，但開始拍攝後逐漸適應同島上居民生活，本來以為只係拍幾日唔會投入咩感情，但拍攝完離開時我都係喊咗出嚟。」似乎相當不捨。