去澳洲玩，必吃當地特產鮑魚，同埋親到酒莊嘆香醇味美嘅紅酒，亞視金牌主持黃麗梅，早前聯同名廚黃永熾同袁文傑去咗澳洲，拍攝節目《嘆盡全世界》同《鮮入為主》，佢哋反轉澳洲，先後去咗阿德萊德（Adelaide）、Barossa同FleurieuPeninsula等地，介紹當地好玩好去處。
身為領隊嘅黃麗梅認為出埠旅行，最重要係要遠離巿區，放縱咁吃喝玩樂。嗜吃鮑魚嘅黃麗梅，此行有食神關照，仲參觀咗生曬鮑魚場，面對數百個溏心大鮑，總值過百萬，佢立即張開雙手，好想將大鮑據為己有，黃麗梅話：「我不嬲好鍾意食鮑魚，靚嘅鮑魚口感好正。」

試酒挑戰酒量

有葡萄酒之鄉美譽嘅Barossa，位於南澳洲，嗰度有超過60間釀酒莊，葡萄園面積超過8900公頃，黃麗梅同袁文傑逐間參觀，仲獲品嚐有錢都買唔到嘅百年佳釀，加上美景當前，二人早已經酒不醉人人自醉，傑仔話：「呢度間間酒莊都提供免費試酒，所以未行晒都幾乎飲醉，好彩我同麗梅酒量都唔錯。」