曾志偉之前傳因為幫ViuTV做世界盃節目而被無綫封殺，不過，志偉原來已經同無綫破冰，喺今晚為《歡樂滿東華》同汪明荃(阿姐)、陳百祥等擔任司儀。

志偉今日同阿姐、阿叻及黎燕珊喺將軍澳電視廣播城出席《東華》拜神儀式，被追問同無綫破冰件事，志偉話:「冇冰，因為《東華》係我最想做嘅節目，由細睇到大。」志偉話東華主席王賢誌早兩、三個月前已經同佢聯絡，由於當時仲度緊期，所以未應承到，而佢今晚做完《東華》之後，聽日就要飛去台灣開戲，又話自己對《東華》同《港姐》都好有感情。

講到目前同無綫關係點樣，志偉話：「不嬲都冇乜特別。」對於傳因為佢幫ViuTV而被無綫封殺，志偉就話自己一路都冇講呢啲嘢，因為佢覺得講係冇用，行動最實際。咁未來仲會唔會同無綫合作？志偉就透露無綫有搵佢做台慶，但因為自己一早接咗工作，所以先至做唔到，若將來有合適工作，佢都會考慮。

另外，阿姐喺facebook甫咗《東華》同志偉拜神及佢班fans「明荃之友」整嘅銀紙花相片，阿姐留言話:「明荃之友會自1981年開始用自制(製)銀紙花為東華三院《歡樂滿東華》籌款，多年來得善款接近$300萬。今年作品『善心星光匯東華』擺設，義賣價$17萬8千元，祝願善心人事事如意，福壽無量！」

精選娛聞，喺晒《娛果》
http://fb.com/appledailyent