李八方Online︱紫荊黨揚言做「首個」貼地政黨 開期票派「高質」蛇齋餅糭
蘋果日報 2021/06/09 09:43
李八方Online紫荊黨
紫荊黨IG圖片
特區政府「完善」選舉制度之後，唔少民主派都意興闌珊無意再參選，但建制派就興致勃勃，仲多多搞作。目標黨員人數超過25萬嘅建制新政團「紫荊黨」，今日就向傳媒宣告，已經正式開咗Facebook專頁及Instagram賬號，仲話嚟緊會有一系列宣傳活動，希望成為香港「首個」貼地政黨咁話。莫非佢眼中，現存啲建制政黨都離晒地？
八方睇過紫荊黨今日發畀傳媒嘅電郵，當中除咗宣佈本月9號開始，會推出全新活動畀香港市民參與，更講明會大送禮物，仲要係有別過往建制派的「蛇齋餅糭」，會係「高質蛇齋餅糭」喎！至於有幾「高質」，該黨就話要留意佢哋嘅社交平台專頁喇。
紫荊黨喺電郵中，又話明該黨嘅「編輯方面」，會以「輕鬆、貼地、諷刺時幣（弊）」方式演繹，唔會偏向「那方向」，確守中立意見。至於「那方向」究竟係乜方向？相信大家要放長雙眼睇睇先知喇。
自認「貼地」、打破傳統、緊貼年輕人嘅政黨，「紫荊黨」呢個logo，係咪令人聯想到某個廣告？網頁截圖
紫荊黨IG已經「上線」，暫有130個「追隨者」。網頁截圖
該黨FB暫只有57人讚好，71人追蹤。網頁截圖
反觀另一個「香港紫荊黨」FB，讚好及追蹤人數均遠勝「紫荊黨」。網頁截圖
-----------------------------