大家知唔知道立法會有個議員叫做馬逢國，係代表體育、演藝、文化及出版界㗎呢？唔知唔緊要，只要知道佢健在就得，點知呢位代表演藝文化嘅議員，卻唔知道界別內大師級人馬嘅狀態。噚日喺立法會辯論「網絡23條」時，馬竟然話著名作曲家顧嘉煇同填詞人黃霑一樣「離開咗」大家，但明明煇哥月底將舉行慈善演唱會，難怪網民話要離開嘅應該係馬逢國囉！

煇哥月尾開騷

馬逢國昨早發言時，講到CASH（香港作曲家及作詞家）嘅4,000名會員中，由「好出名嘅、已經離開咗我哋嘅顧嘉煇、黃霑」到寂寂無聞嘅人都有，但煇哥月尾仲有《顧嘉煇金紫荊慈善演唱會2016》喎，點解咁大吉利是？人民力量慢必即時要求澄清：「霑叔我知道走咗，但係煇哥佢2月尾會喺紅館開演唱會。」主席曾鈺成亦要求馬逢國解釋︰「離開咗我哋即係咩意思？」辳爆嘅馬逢國即刻話喎：「離開咗我哋嘅黃霑叔，同埋好出名嘅作曲顧嘉煇先生。」
唔少網民對於馬逢國嘅質素大叫冇眼睇，質疑點解會有啲咁冇質素嘅議員？網民Timothy Wun則提議煇哥月尾演唱會改名做「永遠懷念‧我們的顧嘉煇（Part 1）演唱會」，然後再整番場「鳳凰重生‧我們的顧嘉煇演唱會（Part 2）」，乘勢宣傳兼加場。
八方都問過當事人煇哥，對於馬逢國呢位業界有冇嘢講，煇哥嘅回應都幾幽默兼有意思㗎：「馬先生，你好！閣下可能貴人善忘，其實我一直生活安好，仲致力於月底慈善演唱會，希望到時你撥空嚟支持同參與。」
唔知馬逢國仲有冇面月底去捧場？但煇哥演唱會嘅製作人丘亞葵，知道馬逢國真係咁講之後，明言「個心淡咗好多」︰「可能馬生真係唔得閒，或者對流行樂壇文化界嘅人士變遷唔了解。」佢透露煇哥呢排未返加拿大，為咗做好月尾嘅演出而專登留港。

識睇睇留言

Stanley Ip：文化界嘅嘢我真係唔識，但我知顧家煇健在
Dickan Fong：咁都可以代表演藝界？
Eric Li：差不多過年，說這樣的話，大吉利是
東尼 陳：請問馬逢國幾時離開我哋？
ping siu：呢啲咪係浪費納稅人啲錢囉
Karson Sze：以為得TREE根、元秋係腦殘，現時一開口，個個都係無常識，無邏輯

資料來源：《蘋果》網頁及fb

李八方
mailto:[email protected]