唔經唔覺轉眼又到維園年宵市場攤位競投時。香港經歷金融海嘯洗禮，維園年宵攤位身價亦大跌，令支聯會喺大跌市中受惠。支聯會主席司徒華一如以往，噚日到灣仔新伊館競投1、2號攤位，大市唔好，華叔最後以1.84萬蚊投到呢兩個筍位，比舊年足足平咗兩萬幾。
華叔低價奪得攤位當然開心，但佢話早前因為捐咗70幾萬畀四川地震災民，搞到支聯會罕有地見紅，出現40幾萬赤字。華叔話，今年除咗會繼續寫揮春，同售賣有關內地民主發展嘅書，仲會推出一系列6.4事件20周年嘅產品，包括T恤、襟章咁，希望市民慷慨解囊，令支聯會收支回復平衡。大家如果同八方一樣支持支聯會，去維園行年宵時記住做嘢表示吓。