雷神莫雷拉係今期(21日)快活谷唯一出足8場嘅騎師，但有一半座騎「高山威龍」、「勝利威」、「理想回報」及「連利之星」季內未贏過，佢一向勇於挑戰，所以有咁嘅選揀一啲都唔出奇。但呢4匹馬久無表現，有雷神孭飛必令同場對手戰意大增。

好似第八場三班1650米隻「連利之星」，上年2月後未贏過，今場重磅及外檔都是障礙；相反同場李寶利座騎「平步青雲」3檔好跑，前仗三班1400米初現走勢，只輸畀「開心旅程」0.75馬位，跑第5首次收到獎金，不過上仗打回原型，氣管有血只得第8名，好彩好快復課，而且操練正常，健康應冇大問題，今次初跑谷草1650米，原來係李寶利主動提出，並要求繼續騎。

李寶利解釋：「『平步青雲』受軟唔受硬，喺跑道較乾快之田草威力打折扣，谷草場地一向較淋更合適，牠喺法國贏1600米表列賽，當時場地狀況正好同谷草相似，咁啱呢幾日連場大雨，賺咗少少天時地利，抽到3檔會試試跟喺放頭馬之後，希望有驚喜啦！」

「平步青雲」曾跑谷草一次，但當時角逐1000米明顯嫌短，只輸4.5馬位唔算差，可能真係谷草特佳，李寶利建議報跑1650米合適得多，爆冷Win絕對唔奇！