我求大俠一直都覺得有需要踢國際賽,但賽期嘅安排就好重要,好似今次無端端安排咗喺季尾呢個爭標或護級都如火如荼嘅時候踢國際友賽,就真係盞搞。
以目前要力爭下屆歐冠盃參賽資格嘅英超球隊利物浦為例,佢哋就一口氣同波蘭門將杜迪、挪威後衞利斯同埋德國中場夏文退出所屬嘅國家隊;而同樣要爭下屆歐冠盃參賽權嘅西甲聯球隊華倫西亞,直頭叫麾下球員艾比達同埋維辛迪玩失蹤,唔好出席西班牙國家隊嘅練習,搞到西國教頭沙斯好鬼嬲。
既然有啲國家隊有咁多球員退咗隊,就算會上陣嘅都多數就住就住,而費事搞到自己受傷,各位球迷喺今晚就千祈要記住咪盲目追捧名牌球隊,最穩陣睇埋個出場陣容先好落槌。
歐兩大盃賽用「銀球」制
歐洲足協決定喺今屆歐冠盃同歐洲足協盃決賽用新例,喺加時用「銀球」代替「黃金入球」。「銀球」其中一方喺加時上半場先入波,都要踢埋上半場,如喺下半場入,就要踢埋下半場。但調查顯示,大部份人都寧願好似以前咁先加時三十分鐘,再射十二碼。梗係啦,起碼場波都抵睇啲!
巴夫斯料被費Sir迫走
英國除咗傳碧咸季尾會離開曼聯,重傳佢隊友巴夫斯都會走。小道消息話曼聯領隊費格遜話巴夫斯要為佢哋喺歐冠盃八強輸畀皇馬,負好大責任(盛傳老費正力邀尼美過檔)。係人都知老費份人霸道,𠵱家老費認定巴夫斯搞到佢唔可以喺奧脫福捧歐冠盃,我求大俠勸巴夫斯好快啲搵定後路。