美國稅改塵埃落定，市場當然唔理咁多炒定先，懶理稅改實際執行後，具體正面影響係咪一如預期強勁。有關稅改，市場最大憂慮不外乎兩樣，第一係會否導致美國政府財政負擔大為惡化，第二係有幾多美國企業海外避稅資金願意回流至美國，而喺呢兩點上市場仍有頗大分歧。

首先，減稅固然不利政府收入，但亦有人認為，減稅會推動企業投資，繼而提升經濟增長並帶動政府稅收增加，緩和減稅負面影響。有分析基於上述邏輯，指減稅實際上對美國政府財政唔會造成太大負擔，但一般睇法係，稅改短期內雖然會刺激企業加大投資，但要期望企業投資會因此而長期增加，就不太實際。

第二，美國企業係咪因為今次減稅，就願意將多年來存放海外避稅嘅盈利滙返美國。的確，倘若企業班資回朝，無論呢筆錢係拎嚟做資本投資，定係用作回購或派息，都肯定會對美股有利，哪怕只得一小部份現金回流，對股價正面效用已不容忽視。不過幾時動用呢張王牌托高股價，要做資本投資時又係咪真係選擇返美國做，都好睇公司本身意願。所以大家不能期望稅改一過，資金就會立即湧返美國。

海外積存現金最豐厚嘅美國公司主要屬科企，科技股理應較其他行業更受惠，但早前科技股竟因行內公司本身稅率普遍較低，而被指係稅改中享有著數較少嘅行業，更成為捱沽對象。即使呢場科技股小股災只係維持咗好短時間就結束，但已反映市場對於較長期嘅稅改影響不太關注。不過隨住有關稅改嘅正面預期喺股價上反映得七七八八，市場對稅改睇法日後勢將更深入立體，假以時日，稅改被當成壞消息睇亦非不可能。

蘋果財經，關心你飯碗
http://fb.com/appledailyatm