民建聯喺港台節目《城市論壇》「失蹤」多時，噚日終於由主席譚耀宗做代表，喺新一季度「復出」，幾名青年民建聯成員陪同主席撐場。驚見民建聯再有代表現身，台下成班維園行動成員都起哄，一開始就拍爛手掌大叫「譚耀宗好嘢」；忽然化干戈為玉帛，唔少在場人士都嘖嘖稱奇，驚覺唔通風水輪流轉？反而民主黨何俊仁就做咗箭靶，幫譚耀宗擋晒煞。

譚耀宗受寵若驚

維園行動當然唔係同民建聯friend咗，但見到佢哋再次肯面對反對聲音，自然要畀啲掌聲鼓勵鼓勵。維園阿哥「馬草泥」任亮憲已經係《城市論壇》象徵人物，佢比壇主謝志峰似乎更加渴望見到民建聯成員重出江湖，所以一見到譚耀宗上台就大叫「歡迎民建聯回歸」。受到高規格歡迎嘅譚耀宗受寵若驚，笑笑口話：「我哋喺適當時候會做適當嘅事。」
雖然民建聯再度出擊，但馬草泥噚日反而用咗最多時間同謝志峰激辯。話說佢見到自由黨主席劉健儀連續幾次都有份做嘉賓，大聲疾呼點解同樣喺立法會有3席，謝志峰成日搵自由黨而唔搵社民連？尤其噚日講住屋政策，社民連都有好多獨到見解，冇理由獨漏社民連？

主持解釋揀嘉賓

見慣大場面嘅謝志峰冇被嚇怕，解釋嘉賓座位有限，無奈要有選擇，今次請唔到下次請番。而且雖然台上冇位，台下發言一樣好重要，所以佢都特別點咗馬草泥首先發言，都算有所平衡。馬草泥強調唔係代表社民連去維園，所以不代表社民連。
政改一役後，民主黨人每次去到城市論壇都被喝倒采，噚日主席何俊仁亦單人匹馬赴會，發言時不時被維園行動嘅成員倒豎拇指同舉標語諷刺，處境比譚耀宗坎坷。
何俊仁同公民黨黨魁余若薇都講明，如果煲呔即將發表嘅施政報告冇具體政策回應住屋問題，又冇措施解決市民所需，相信大家都唔會手軟，極大機會否決向施政報告致謝，煲呔都要醒醒定定至好呀。

mailto:[email protected]