【澳門直擊】韓劇《Doctors》女星朴信惠噚日現身澳門，出席代言水晶品牌Swarovski舉行嘅聖誕樹亮燈儀式，現場有棵12米高聖誕樹，其他出席嘉賓有倪晨曦、歐鎧淳、楊舒婷、鍾浠文同連詩雅。
着到紅噹噹嘅朴信惠前日已抵達澳門，佢接受傳媒訪問時話，今次係佢首次踏足澳門，不過噚日出席活動前先離開房間。問佢今年聖誕點過？佢就話自己係教徒，所以會同家人去教堂做崇拜，又會喺屋企同朋友開party。

倪晨曦感情穩定

之前同方力申傳緋聞嘅楊舒婷，俾記者追問聖誕節有冇約小方同發展機會，不停重複話冇，但承認有聯絡：「我哋係拍旅遊特輯先識，傾偈都係講寵物嘢。」問佢對小方印象如何？楊舒婷就讚佢細心同有陽光氣息。
同場嘅倪晨曦話稍後會抽少少時間返南京探婆婆，因為婆婆身體唔好，另外會同男友慶祝聖誕，因為男友家人都幾重視呢個節日。問男友可有機會趁節日同佢求婚？倪晨曦即少少尷尬咁話：「應該唔會喇！」佢又話男友係圈外人，拍咗幾年拖都穩定，但問佢係咪結婚對象，佢就話隨緣。打扮到成個禮物咁嘅歐鎧淳話近日開始要為亞運選拔賽訓練，佢又話男友胡子彤𠵱家喺新加坡參加電影展，聖誕可以一齊過。
採訪、攝影：曾小嘉