【李八方online】超貼地氣導師 教路創業做波士
創業李八方許華傑
中華出入口商會推出創業基金,除咗提供資助,仲有貼地氣導師教路。中華出入口商會網頁
唔少年輕人都想創業,試下做boss會係點?萬事若缺錢就肯定唔得掂,坊間就有唔少計劃出錢助有志創業嘅年輕人發展,其中香港中華出入口商會亦喺民政事務局青年發展基金撥款支持下,推出「青年壯志-I am the boss」資助計劃,支援18至35歲嘅創業者,計劃同時獲該會榮譽會長林龍安透過中出慈善基金贊助150萬元作為資助配對,成功申請可獲資助最多45萬創業資金。
但原來錢並唔係呢個計劃嘅最大賣點,負責呢個波士project嘅中出商會副秘書長許華傑話,佢哋同時會提供培訓同顧問服務,由營商導師畀啲意見創業者,佢賣花讚花香咁話:「我哋嘅導師雖然唔係世界明星級,但全部都好貼地氣,好有經驗㗎」,而且傾向寬鬆還款期,讓申請人喺計劃期內連續3個月有盈餘下,第四個月先開始每月償還當月盈利嘅20%,以減輕營運資金嘅壓力。
有冇貼士可以畀參加者突圍而出?許華傑話佢哋完全無任何框框同限制,「唔一定要搞IT,賣魚蛋都得㗎,至緊要sell得我哋服,覺得係可行嘅計劃。」
第一期計劃即日起至5月15日接受申請,想做波士可致電2544 8474查詢,或參閱呢個網站: http://hkciea.org.hk/2017/02/23/youth_development_fund/ 。