早喺60年代已經出道嘅保羅韋浩雲，自從83年正式進軍荷李活之後，都冇返過家鄉拍片，不過佢早年喺荷蘭拍嘅《土耳其狂歡》（TurksFruit）、《納粹軍旗下》（SoldierofOrange）同《第四個男人》（TheFourthMan）都係拍得比佢喺荷李活嘅作品更大膽同更有格調，本周四（26日）正式上映嘅《黑色名冊》亦被認為係佢返家鄉嘅回勇之作。

《黑》片嘅製作費高達8,000萬港元，雖然唔及荷李活嘅大製作，但已經係荷蘭投資最高電影。套片可以話係延續導演30年前嘅作品《納粹軍旗下》，兩者同樣以二次大戰作故事背景，《黑》片就係根據真實歷史事件而創作嘅動作驚慄片，導演同編劇花咗20年完成劇本，大部份角色都係改編自真人真事。
影片講述猶太女歌手Rachel，因為戰亂被迫舉家逃往荷蘭，途中卻被德軍截劫，只有佢幸運逃出生天。為咗替家人報仇，佢決定改名Ellis加入地下軍，並奉命潛入德軍情報局做卧底，通過一本黑皮書上嘅名單，尋找叛徒以及同謀，當然就唔少得運用美人計啦！

飾演女主角嘅荷蘭演員卡莉絲范侯登（CaricevanHouten），舉手投足令人想起美國女歌手ChristinaAguilera。佢喺片中由頭帶到落尾，早前喺威尼斯影展中大獲好評，可惜敗喺無敵影后海倫美雲（HelenMirren）手下。
喺奧斯卡最佳外語片《竊聽者》（TheLivesOfOthers）度扮作家嘅德國影星史巴斯甸高治（SebastianKoch），喺《黑》片中則飾演一名善良納粹軍官，仲同女主角發生一段微妙感情，估唔到現實中佢哋都做埋情侶㖭！