當年今日
關於我們

【呵欠~】黃榕再解「執三攤」又賴冇楊子瑤電話

蘋果日報 2015/08/12 06:00

蘋果香港黃榕女主角即時是非齊昕男極探射燈楊子瑤

由劉俊輝執導、李逸朗(Don)主演嘅電影《男極探射燈》雖然已經煞科,但係是非仍然沒完沒了。先有第一任女主角齊昕突然辭演,再有頂上嘅楊子瑤暗寸有人唔正常,日前再有報道引述黃榕表示自己「執三攤」接替楊子瑤演出《男》片,再到前日楊子瑤接受本報訪問,話有人借機搞新聞。

成件事咁多轉折,今日當然又有新發展,黃榕凌晨喺facebook回應話:「本人黃榕從來沒有説自己是電影《男極探射燈》女主角。『執三攤』一直是説社工『童童』這個角色,由最初牛雜妹到蔚雨芯,最後兩位不能演出,最終社工童童角色由我演出。」仲話自己一直有做好本份,又搬埋發表「執三攤」論當日都在場嘅仙樂都出嚟,證明佢冇話自己係呢部電影嘅女主角。

之後黃榕再賣口乖借機幫部戲宣傳話,成段回應提咗三次戲名,又猛話多謝監製明哥給佢機會,仲話:「如果引起子瑤不滿及不快樂,因為沒有對方電話,巳與劇組監製明哥聯絡解釋。祈求是非遠離我,只想努力工作,希望電影《男極探險燈》一切順利!感恩。」

其實呢套戲未上淨係睇啲演員回應都咁精采,男主角Don李逸朗更加無間斷炒是非谷人氣,真係宣傳費都慳番。

但係呢,買唔買飛入場,自己諗喇。