由伍詠薇（伍姑娘）和林盛斌（Bob）主持的清談節目，日前請來黃宗澤（Bosco）、吳卓羲（Ron）和苗僑偉（三哥）任嘉賓。節目中伍姑娘讚三哥是好前輩，會顧慮他人感受，她自爆入行以來，試過拍劇時遇過有位前輩扮大牌，對同行態度亦很差。她憶述：「嗰時我喺娘家（亞視）過嚟呢邊……」之後她擺出該前輩chok爆表情：「咁我唔講邊個喇！」她叫嘉賓自己估，而Ron等人亦似乎心裏有數，讚她扮得神似，Ron說：「應該都係嗰個。」

提到該前輩的「事跡」，伍姑娘說：「（該位前輩）唔會教呀，直情可能嚟到慢慢講啦，講錯咗再嚟過，你濕晒你嘅事，或者會唔到、遲到、失蹤或者8小時後先返工都係咁樣。你哋都識佢。我講出嚟我就死梗呀！」嘉賓問當事人是否尚在？伍姑娘即道：「梗係尚在啦！」

之後，伍姑娘越爆越興奮，除了再擺出chok甫士，又對三哥說：「你五虎有邊幾個吖？其中一個，嗰個人好鍾意學佢（五虎其中一位）嘅，唔講邊個喇！你五虎內都有其中一個。」講到這裏，謎底幾乎呼之欲出，伍姑娘再補充：「佢以前好衰呀，不過而家好好人，以前睬你都儍呀，如果見到你哋後輩點，話知你死，望都唔望你一眼，我心諗『吓』！」Bob再問伍姑娘該人姓名是否得兩個字，伍姑娘聞言反眼兼提高聲調說：「死喇今次，人哋全家嚟打我咁點呀？」

由於伍姑娘提供的貼士，多角度之餘又夠立體，事後網民幾乎一面倒留言問她該前輩是否江華，伍姑娘今日接受傳媒訪問時笑說：「係邊個我真係唔會講，我喺節目度爆呢樣嘢，純粹係大家分享自己一啲開心同唔開心嘅感受、自己過往嘅一啲經歷，都係想大家笑吓、估吓，我絕對唔係想去傷害人。同埋人會變㗎嘛，對方都變咗，變得好好，我哋大家再碰面都完全冇嘢，總之邊個我就一定唔會講㗎啦。」

-----------------------------
打國際線 《蘋果》英文版免費試睇 按此了解更多
英文版已登錄新版《蘋果》App按此下載/更新