釣魚島主權問題一直未解決，日本近日再度挑釁發起買島行動，引起關注。16年前，香港保釣烈士陳毓祥，在釣魚島宣示中國主權時不幸身亡，遺下太太及一對年幼子女。當年只得8歲的幼子陳安立，現已完成大學晉身娛樂圈，並希望有朝一日能以中國人身份，在釣魚島游水。

香港保釣烈士陳毓祥逝世至今16年，遺孀劉舜卿當年拖着10歲長女陳安然、8歲幼子陳安立（Brian），在為亡夫於維園舉行的追悼會上，淚濕衣襟許下諾言：「我一定為佢養大對仔女，希望大家支持我。」陳媽媽履行了諾言，把兩姊弟養育成才，姊姊安然與弟弟Brian都不約而同入了演藝界，安然主攻舞台劇，Brian擔任now觀星台及芒果台的娛樂節目主持，同時他亦努力學唱歌，預備向樂壇進發，他又實現爸爸生前組籃球隊的遺願，自組了一隊籃球隊Hero。

「爸爸人生短暫但輝煌」

回望爸爸一生，Brian前日接受本報記者專訪時說：「爸爸人生雖然好短，只得45年，但好輝煌、好有意義，身為陳毓祥個仔，我好驕傲。」媽媽沒有逼他延續爸爸的保釣理想，他自知不及爸爸，倒不如走自己的路，以平常心睇政治、睇釣魚島，不過Brian還是有個心願，他說：「希望有朝一日能夠以中國人身份，喺釣魚島游水。」
在16年前爸爸的追悼會上，穿上孝服跪別亡父的小朋友Brian，今已是身高6呎2吋、24歲的成年人，流着爸爸陳毓祥陽光健康的正氣，他冷靜地回憶着許多前塵往事說：「嗰時我讀緊小學四年級，放學返到屋企，見到媽咪同家姐好傷心，崩潰咁喊，我唔知發生乜事，心裏知道應該有啲嘢。之後多咗好多人關心我，好多叔叔、阿姨帶我去玩、買嘢食，返到學校，校長、老師、同學又特別照顧我，每人都送上心意卡。我喺學校從來唔係風頭躉，突然之間多咗好多人關心。」

愛聽小故事學大道理

過了幾天，Brian終於知道發生甚麼事，一向是爸爸、媽媽寶貝仔的他竟然沒有哭，他跟自己說：「屋企剩番我一個男仔，我要孭起頭家，要堅強，爸爸同我講過，英雄流血不流淚。」Brian不單止遺傳了陳毓祥昂藏6呎的身高，還遺傳了他剛強硬朗的性格。
Brian說：「每逢星期六或日，爸爸都會帶我去沙田娛樂城睇電影，係一間好舊嘅戲院，次次都係睇熱血、愛國或正氣凜然嘅電影，好似《洪熙官》之類，因為家姐忙做功課，但唔知點解我唔使做功課，媽咪留喺屋企陪家姐，通常只得我同爸爸兩個。」他還記得爸爸每朝早都會一邊食早餐，一邊講故事，Brian說：「爸爸好鍾意講故事，都係嗰啲小故事大道理，每日我同家姐返學前，佢都一定會講幾分鐘。」
陳毓祥愛做善事，Brian於6歲那年已開始跟爸爸到內地參加希望工程，他說：「爸爸帶我同家姐去，印象中有部軍車接送我哋，要坐20幾個鐘車，又冇得去廁所，好辛苦至去到一個好落後嘅地方，不過爸爸好開心。」在Brian印象中，爸爸是位從來不打不鬧的慈祥好爸爸，不過有一次，他把爸爸激得好嬲，他說：「爸爸每日會畀5蚊零用錢我，有時我冇買零食，將錢儲起。有一日，有個同學問我借20蚊，我借咗畀佢，之後佢同我講過幾日會還番30蚊畀我，幾日之後，呢位同學真係還咗30蚊，我好開心，咁大仔從未試過賺錢，仲要冇做過任何嘢，幾日之間就賺到10蚊。返到屋企，好開心同家姐、媽咪、爸爸講，爸爸聽咗之後反應好大，嬲得好緊要，好惡咁鬧我，我未見過爸爸咁嬲、咁惡，嗰次係爸爸第一次鬧我，亦係最後一次。」

每年寫家書遙寄亡父

下周日（17日）就是父親節，對於與爸爸只能共度短短八個父親節的Brian來說，很感謝爸爸送他很快樂的童年回憶，他說：「因為公公、爺爺同爸爸都過咗身，父親節對我嚟講感覺好淡，不過我仲好記得以前每個父親節同生日，我哋全家都會食蛋糕，唔記得由邊年父親節開始，我會寫一封信畀爸爸，話畀爸爸知我會考喇、大學畢業喇、好開心學校派咗我去捷克做交流生、參加nowCEO主持選拔賽贏咗冠軍，做埋主持。」
Brian續說：「爸爸喺外面係一位鐵漢，但喺屋企就好溫柔，反而媽咪對我同家姐管教好嚴，唔准飲汽水、食薯片、睇電視，自從爸爸過身後，媽咪變得好堅強，變到好似爸爸一樣，凡事有商有量，當我哋係朋友，仲母兼父職，學爸爸每逢假日帶我同家姐去踩單車、野餐、打籃球同睇戲。」他驕傲有個保釣烈士爸爸，更驕傲有個永遠不倒的媽媽，他說：「我同家姐個名係有意思，係嫲嫲幫我哋改名，陳安然，安樂泰然；陳安立，安身立命。」採訪：陳玉琼