國務院前總理李鵬大仔、華能國際（902）前董事長李小鵬（圖），噚日突然離開工作咗17年嘅華能大家庭，原來並唔係去傳聞中嘅國家能源局。據內地網站《財經網》引述電力業界消息指，李小鵬將調任山西做副省長，棄商從政，參與管理呢個煤資源非常充足嘅省分。
報道引述一名華能內部人士話，李小鵬離開集團係意料中事，因為呢兩年曾經多次傳出佢將會從政嘅消息，喺華能內部已經唔係乜嘢秘密。報道仲估計，喺電力領域具豐富經驗嘅李小鵬被調到山西，有希望可以加快當地發展清潔能源嘅速度。
以往華能股東會都會喺內地召開，李小鵬為人亦較低調，所以香港傳媒較少機會接觸到佢，每年最多可以見到兩次，分別係中期業績同埋全年業績記者會，睇嚟日後可能連呢兩個機會都冇。唔知第日李副省長會唔會掛住香港傳媒呢？