李克勤、周柏豪、吳業坤及王菀之等前晚在尖沙嘴出席「新城勁爆頒獎禮2017」慶功宴，英皇和新城破冰，克勤奪得三個半獎成為大贏家，包括勁爆年度歌手、勁爆播放指數、勁爆演繹大獎《失魂記》及勁爆合唱歌曲。陳柏宇、側田、衛蘭及王菀之各奪三獎，平分秋色。克勤說：「係公司嘅功勞，我一個人做唔到，好似一場波，贏波係全隊人嘅努力。」提到當年事業低潮時，得到新城贈獎雪中送炭，他說：「以前最衰嘅時候，頒獎禮唔請我，有乜衰得過請都唔請，所以𠵱家學識感恩。」

坤哥撐Aka

傳聞星夢和環球不滿新城頒太多獎給克勤，因而杯葛頒獎禮，星夢旗下的柏豪說：「唔知道原因，只知唱片公司唔出席，我今年轉公司，唔可以抹煞其他單位嘅努力，所以堅持四個頒獎禮都會出席。我有解釋原因，唔影響佢哋，佢哋亦唔左右我。」
同場的坤哥談到緋聞女友Super Girls成員Aka的畫展「HER」作品被指涉抄襲，他力撐說：「相信唔係嘅，感覺到佢有情感喺入面。」Aka則說：「畫展主題以女性為主，以心臟為題去畫，每個人嘅心臟都係一樣。」另外，身在加拿大的楊洛婷，日前在Ig為父親集氣，原來楊爸爸剛接受12小時的心臟移植及腎臟移植手術，樂隊Dear Jane主音老公阿Tim前晚於頒獎禮後受訪時說：「太太有傳message畀我，話岳父情況好好，個手術好順利。」岳父是否已醒？他說：「醫生話術後要一段時間，太太話岳父已可自己透氣，康復得好快。」
採訪：王連連、曹家誠　
攝影：陳俊強