有讀者根據電話短訊之推廣優惠購買意外保險，卻遲遲未獲保險公司提供電話費用回贈，最後只好退保。
讀者周先生投訴稱，大新人壽原本承諾的回贈，超過兩個月仍未提供。他不滿說：「我做裝修嘅，雖然自己有買意外住院保險，但就冇包括受傷期間嘅收入保障，加上早排見有同事受傷開唔到工，所以5月時，我收到大新推銷意外保障嘅短訊，見有人工賠償，覺得啱用就買咗！每月保費250元，每個月又會回贈37元入我手提電話費賬戶入面。」
可是，周先生如期繳交保費，回贈卻一直未見蹤影。「我份保單5月初生效，電話截數日期係每個月25號，佢應該6月就入番啲回贈畀我，但我6月嘅賬單唔見呢條數，打電話去問，之後佢查完就覆番電話話登記電話錯咗，要遲一個月先入到畀我！呢個解釋都唔合理，有乜理由錯咗，仲可以打電話畀我！𠵱家已經7月嘞，仲退唔到回贈畀我，啲服務咁差，我決定退保。」
大新人壽回覆本報查詢稱，周先生所購之意外保障，保單持有人可享每月電話費折扣，但需待每月收妥保費後，於翌月回贈有關金額到指定之手提電話費賬戶內，故周先生於5月投保，原則上應在6月時回贈予其手機賬戶。