剛周二（25日）是公眾假期，不設試閘，唔少外籍大師傅都順勢小休一日，但朝早喺沙田馬場過磅室外，韋達卻好勤力，穿運動裝同波鞋，帶埋兩隻約瑟狗仔慢跑。

有記者問韋達點解唔放假，佢話身為騎師，從來都唔會理公眾假期，每日都要保持運動量，中秋節大家都食月餅應節，佢就嫌糖份太高，一定唔會食，唔怪得11月就47歲嘅「十三少」，身型依然咁fit。

韋達上星期六騎「軍力勁」，幫大摩贏出季內首場頭馬，當日「軍力勁」於泥地1200米克服11檔，出閘後不慌不忙切入內檔，跟係放頭馬之後，直路加速拋離對手輕勝2.75馬位。

事隔幾日，大摩仍盛讚韋達嘅完美發揮，今晚（26日）谷草賽馬更有一匹「軍力勁2.0」交俾韋達搏殺。

呢匹「軍力勁2.0」就係第七場三班1200米隻「大風暴」，今場喺8檔起步，大摩預期「大風暴」嘅跑法會同「軍力勁」相似。

「大風暴」上季跑咗14場，莫雷拉、潘頓、柏寶等好手都騎過，搏來搏去最叻都只係得2亞1季，但唞暑後此駒似乎成熟進步，日前試閘跑第一，狀態起得甚佳，今次是其第一次由韋達壓陣，人馬可望擦出火花。